samer_smsm44
عضو فضى
عدد المساهمات : 743
تحيه الاعضاء : 34
 |  موضوع: كلمينى يا مصر  الخميس أكتوبر 20, 2011 10:23 am | |
| كلمينى يا مصـــــــر
كلميني يا مصر كلميني
وأحكي كل حاجة و فهميني
كلميني ع اللي حلمنا بيه زمان
وع اللي كان شجاع وصار جبان
واللي كل يوم بيبات جعان
كلميني عن الغلابه
وكلميني عن الديابه
بس أوعي تقولي مش عايشين ف غابه
----------------
كلميني عن قوانين
واللي منها معصومين
واللي بيها مغصوبين
واللي يحمد ربه ويقول مستورين
ع اللي سايق بس مش لابس حزام
واللي ف التخشيبة خد علقة تمام
واللي لسه يقدر يحلم لو ينام
----------------
كلميني يا مصر كلميني
وأحكي كل حاجة وأشرحيلي
كلميني عن ولادنا ف المدارس
وكلميني عن أبوهم اللي حايس
وحسبة المرتب اللي فيها لايص
وانه مهما يكبر برضه ناقص
كلميني عن معاهدة للسلام
وعن مواطن جوة بلدة عاش مهان
كلميني ع اللي مش لاقي الرغيف
واللي بيته أتهد وبايت ع الرصيف
واللي مش عارف يعيش
واللي في برد الشتا
بات ومش لاقي الغطا
واللي عكس السير يسير
واللي ابن البيه وزير
واللي ف الأحزان أسير
واللي نام من غير سرير
و اللي عن حقوقه ساكت
واللي وقت الشدة فاتك
----------------
كلميني عن اللي بيقول وانا مالي
واللي يفرح لو يقول عايش ف حالي
واللي جنب الحيطة ماشي
واللي لاموأخذة حافي
كلميني عن مرتب الموظف لو يذيد
والأهلي لما بيضربوه ف بورسعيد
وأحكي قولي ع القديم وع الجديد
كلميني عن الحقيقة والخداع
واللي واكل حق غيرة واللي جاع
واللي شاور ع الحقيقة قطعوله الصباع
----------------
كلميني ع اللي شاري واللي باع
واللي وسط الزحمة صوتة ضاع
عن بنت حلوة ووردتين
و قنبلة فجروها ف الحسين
عن غازنا لما للعدو بيصدروه
والجنية لما شكلة يغيروه
كلميني عن صفرنا ف المونديال
والنايب اللي نام ف البرلمان
واللي كل كلامه زور
واللي عمرة ما يكدب لو يقول
واللي رافع أيدة ال موافقون
----------------
كلميني عن الوراثة
لما تدخل ف السياسة
كلميني عن الحضارة
وكلميني عن البطالة
وأحكي قولي عن الحديد والعز
اللي كل يوم ف السوق بيهز هز
واللي بيحشش
واللي بيبقشش
واللي بيغش واللي بيغشش
----------------
كلميني عن زهور تفتح ف الربيع
واللي ناوي يشتري ولا يوم يبيع
واللي واثق ان حقه فيكي لن يضيع
أتكلمي بس قولي بجد
لسه فيه أمل ولا وصلنا لحارة سد | |
|
hady ali
نائب المدير العام
عدد المساهمات : 337
تحيه الاعضاء : 45
| |
Admin
المدير العام
عدد المساهمات : 2848
تحيه الاعضاء : 137
| | موضوع: رد: كلمينى يا مصر الأحد أكتوبر 23, 2011 12:33 am | |
| تقدرى تسالى المجلس العسكرى هو مع مين فى مصر
مع اللى سرق وقتل
ولا مع اللى اتسرق وانقتل | |
|
تسلم ايدك
